الرئيسية / اعمدة الصحف / #أعمدة || حاطب ليل || د. عبداللطيف البوني || ﺣﻖ ﺍﻟﺤﺮﻛﺔ ﺑﺮﻩ ‏( 1 ‏) ﻭﺟﺪﺗﻬﻢ ﻋﻨﺪ

#أعمدة || حاطب ليل || د. عبداللطيف البوني || ﺣﻖ ﺍﻟﺤﺮﻛﺔ ﺑﺮﻩ ‏( 1 ‏) ﻭﺟﺪﺗﻬﻢ ﻋﻨﺪ

#أعمدة
|| حاطب ليل || د. عبداللطيف البوني ||
ﺣﻖ ﺍﻟﺤﺮﻛﺔ ﺑﺮﻩ
‏( 1 ‏)
ﻭﺟﺪﺗﻬﻢ ﻋﻨﺪ ﻃﺮﻑ ﺍﻟﺴﻮﻕ ﻓﻲ ﺣﺎﻟﺔ ﺟﺪﻝ ﻣﺤﺘﺪﻡ , ﺃﺻﻮﺍﺗﻬﻢ ﻣﺮﺗﻔﻌﺔ,
ﺃﻳﺪﻳﻬﻢ ﺗﻌﻠﻮ ﻭﺗﻬﺒﻂ ﻭﻟﻤﺎ ﻛﻨﺖ ﺃﻋﺮﻓﻬﻢ ﺟﻤﻴﻌﺎً ﺇﺑﺮﺍﻫﻴﻢ ﺻﺎﺣﺐ ﺍﻟﺒﻮﻛﺴﻲ
ﻭﺁﺩﻡ ﺳﻴﺪ ﺍﻟﻜﻨﺘﻴﻦ ﻭﺍﻟﺠﻴﻠﻲ ﺍﻟﺘﺸﺎﺷﻲ ﺗﺮﺟﻠﺖ ﻭﺫﻫﺒﺖ ﺇﻟﻴﻬﻢ ﻣﺴﺮﻋﺎً ﻳﺎ
ﺟﻤﺎﻋﺔ ﺍﺳﺘﻬﺪﻭﺍ ﺑﺎﻟﻠﻪ , ﺟﻤﻌﺘﻮﺍ ﻓﻮﻗﻜﻢ ﺍﻟﻨﺎﺱ , ﺍﻟﺤﺎﺻﻞ ﺷﻨﻮ ؟
ﺑﺪﻭﻥ ﻛﺜﻴﺮ ﺗﻔﻜﻴﺮ ﺗﺒﻴﻦ ﻟﻲ ﺃﻥ ﺍﻟﺨﻼﻑ ﺑﻴﻦ ﺻﺎﺣﺐ ﺍﻟﺒﻮﻛﺴﻲ ﻣﻦ ﺟﻬﺔ
ﻭﺍﻵﺧﺮﻳﻦ ﻣﻦ ﺟﻬﺔ ﺃﺧﺮﻯ ﻓﻄﻠﺒﺖ ﻣﻦ ﺇﺑﺮﺍﻫﻴﻢ ﺃﻥ ﻳﺤﻜﻲ ﻟﻲ ﺍﻟﺤﺼﻞ
ﻓﻘﺎﻝ ﻟﻲ، ﺇﻧﻪ ﺍﺗﻔﻖ ﻣﻊ ﻫﺆﻻﺀ ﺍﻟﺠﻤﺎﻋﺔ ﺃﻥ ﻳﻘﻠﻬﻢ ﻟﻠﺴﻮﻕ ﺑﻌﺸﺮﺓ
ﺟﻨﻴﻬﺎﺕ ﻟﻠﻨﻔﺮ ﻭﻟﻜﻦ ﺇﺫﺍ ﻗﺎﺑﻠﺘﻬﻢ ﺷﺮﻃﺔ ﺍﻟﻤﺮﻭﺭ ﻓﺎﻟﻤﺨﺎﻟﻔﺔ ﺳﺘﻜﻮﻥ
ﻋﻠﻴﻬﻢ ﻳﻘﺘﺴﻤﻮﻧﻬﺎ ﻓﻴﻤﺎ ﺑﻴﻨﻬﻢ ﻭﺑﺎﻟﻔﻌﻞ ﻗﺎﺑﻠﺘﻬﻢ ﻋﺮﺑﺔ ﺍﻟﺸﺮﻃﺔ ﻓﺪﻓﻊ
ﺇﺑﺮﺍﻫﻴﻢ ﺍﻟﻤﺨﺎﻟﻔﺔ ﻭﻟﻜﻨﻬﻢ ﺍﻵﻥ ‏(ﺧﺮﺧﺮﻭﺍ ‏) ﻋﻠﻰ ﺣﺴﺐ ﺗﻌﺒﻴﺮ ﺇﺑﺮﺍﻫﻴﻢ .
‏( 2 ‏)
ﻗﻠﺖ ﻟﻬﻢ ﻳﺎ ﺟﻤﺎﻋﺔ ﺍﻟﺮﺍﺟﻞ ﺑﻴﺮﺑﻄﻮﺍ ﻣﻦ ﻟﺴﺎﻧﻪ ﻭﺍﻧﺘﻮﺍ ﺷﻔﺘﻮﺍ ﺍﻟﺮﺍﺟﻞ
ﺩﻓﻊ ﺍﻟﻤﺨﺎﻟﻔﺔ ﻓﺘﺼﺪﻯ ﻟﻠﻤﻮﺿﻮﻉ ﺍﻟﺠﻴﻠﻲ ﻗﺎﺋﻼً ﻧﺤﻦ ﻳﺎ ﺃﺳﺘﺎﺫ ﻋﻨﺪ ﻛﻠﻤﺘﻨﺎ
ﻭﻓﻌﻼً ﺍﻟﺸﺮﻃﺔ ﻻﻗﺘﻨﺎ ﻭﺇﺑﺮﺍﻫﻴﻢ ﻣﺸﻰ ﻟﻴﻬﺎ ﻭﺩﺧﻞ ﺍﻳﺪﻩ ﻓﻲ ﺟﻴﺒﻪ ﻭﺩﻓﻊ
ﻭﻟﻤﻦ ﺟﺎﺀ ﻳﺤﺎﺳﺒﻨﺎ ﻗﺎﻝ ﻟﻴﻨﺎ ﺍﻧﻪ ﺩﻓﻊ ﺧﻤﺴﻴﻦ ﺟﻨﻴﻪ ﻓﻘﻠﻨﺎ ﻟﻴﻪ ﺃﺩﻳﻨﺎ
ﺍﻹﻳﺼﺎﻝ ﻓﻘﺎﻡ ‏( ﻳﺒﻄﺒﻂ ‏) ﻋﻠﻲ ﺍﻟﻄﻼﻕ ﻟﻮ ﺩﻓﻊ ﻣﺎﺋﺔ ﻧﺤﻦ ﻋﻨﺪ ﻛﻠﻤﺘﻨﺎ ﻟﻜﻦ
ﺍﻟﺰﻭﻝ ﺩﺍ ﻣﺎ ﺩﻓﻊ ﺧﻤﺴﻴﻦ . ﻓﺮﺩ ﺇﺑﺮﺍﻫﻴﻢ ﻣﻮﺟﻬﺎً ﺣﺪﻳﺜﻪ ﻟﻲ ﻳﺎ ﺃﺳﺘﺎﺫ
ﺃﻧﺖ ﻣﺶ ﻋﺎﺭﻑ ﺍﻧﻪ ﺍﻗﻞ ﻣﺨﺎﻟﻔﺔ ﺧﻤﺴﻴﻦ ﺟﻨﻴﻪ ؟ ﻗﻠﺖ ﻟﻪ ﻧﻌﻢ ﻓﺼﺎﺡ
ﻭﻃﻴﺐ ؟ ﻓﺘﺪﺧﻞ ﺍﺩﻡ ﺳﺎﺋﻼً ﻭﻳﻦ ﺍﻻﻳﺼﺎﻝ ؟ ﺭﺩ ﺍﺑﺮﺍﻫﻴﻢ ﻭﻗﻊ ﻣﻨﻲ ﻓﻲ
ﺍﻟﻄﺮﻳﻖ . ﻓﻘﺎﻝ ﺍﺩﻡ ﺍﻧﺎ ﺭﺍﻛﺐ ﻣﻌﺎﻙ ﻗﺪﺍﻡ ﻭﻟﻤﻦ ﺟﻴﺖ ﺭﺍﺟﻊ ﺟﻴﺖ ﺑﺪﻭﻥ
ﺍﻳﺼﺎﻝ . ﺛﻢ ﺛﺎﻧﻴﺎً ﻳﺎ ﺍﺑﺮﺍﻫﻴﻢ ﻃﻪ ﺍﻟﻤﺸﻠﺦ ﺍﻟﻜﺎﻥ ﻃﻠﻊ ﻗﺪﺍﻣﻚ ﺿﺮﺏ ﻟﻴﻚ
ﻭﻗﺎﻝ ﻟﻴﻚ ‏( ﺍﻟﺠﻤﺎﻋﺔ ‏) ﻭﺍﻗﻔﻴﻦ ﻓﻲ ﺍﻟﻜﺒﺮﻱ ﻏﻴﺮ ﻃﺮﻳﻘﻚ ﻭﺗﻌﺎﻝ ﺑﺎﻟﺠﻨﺎﺑﻴﺔ
ﺍﺑﻴﺖ ﺗﺴﻤﻊ ﻛﻼﻣﻪ ﺩﺍ ﻛﻠﻪ ﻋﺸﺎﻥ ﺗﺮﺑﺢ ﻓﻴﻨﺎ ﻧﺤﻦ ؟ ﻧﻌﻢ ﺍﻧﺖ ﺩﻓﻌﺖ ﻟﻜﻦ
ﻣﺎ ﺩﻓﻌﺖ ﺧﻤﺴﻴﻦ ﻭﺍﻧﺖ ﻋﺎﺭﻑ ﻭﻧﺤﻦ ﻋﺎﺭﻓﻴﻦ ﻭﺭﻳﻨﺎ ﺍﻟﺪﻓﻌﺘﻮﺍ ﻋﺸﺎﻥ
ﻧﺪﻳﻚ ﻗﺮﻭﺷﻚ ﻭﻧﻤﺸﻲ ﻧﺸﻮﻑ ﺷﻐﻠﻨﺎ ﻭﺍﻧﺖ ﺗﺸﻮﻑ ﺷﻐﻠﻚ .
‏( 3 ‏)
ﺃﺻﻞ ﺍﻟﺤﻜﺎﻳﺔ ﺃﻳﻬﺎ ﺍﻟﺴﺎﺩﺓ ﻫﻮ ﺃﻥ ﺷﺮﻃﺔ ﺍﻟﻤﺮﻭﺭ ﺍﻋﺘﺎﺩﺕ ﺍﻥ ﺗﺨﺮﺝ ﻣﻦ
ﺷﺎﺭﻉ ﺍﻟﺨﺮﻃﻮﻡ ﻣﺪﻧﻲ ﻭﺗﺬﻫﺐ ﺍﻟﻰ ﺍﻻﺳﻮﺍﻕ ﺍﻟﺮﻳﻔﻴﺔ ﺫﺍﺕ ﺍﻻﻳﺎﻡ
ﺍﻟﻤﻌﻠﻮﻣﺔ ﻭﺍﻟﺘﻲ ﻳﺄﺗﻲ ﺍﻟﻴﻬﺎ ﺍﻟﻤﺰﺍﺭﻋﻮﻥ ﻭﺍﻟﻌﻤﺎﻝ ﺑﺒﻌﺾ ﻣﺎ ﻓﻲ
ﻣﺨﺎﺯﻧﻬﻢ ﻣﻦ ﺍﻟﻤﺤﺎﺻﻴﻞ ﺷﻮﻳﺔ ﻟﻮﺑﻴﺎ ﻋﺪﺳﻴﺔ , ﻭﻛﺮﻛﺪﻱ ﻭﻃﻤﺎﻃﻢ ﻣﺠﻔﻔﺔ
‏( ﺻﻠﺼﺔ ‏) ﻭﺑﺎﻣﻴﺔ ﻣﺠﻔﻔﺔ ‏( ﻭﻳﻜﺔ ‏) ﻭﺑﺼﻞ ﻭﺍﻟﺬﻱ ﻣﻨﻪ ﻟﻴﺒﻴﻌﻮﻧﻬﺎ
ﻭﻳﺸﺘﺮﻭﺍ ﺑﺜﻤﻨﻬﺎ ﺑﻌﺾ ﺍﻟﺴﻠﻊ ﻣﻦ ﺳﻜﺮ ﻭﺷﺎﻱ ﻭﻋﺪﺱ ﻭﺭﺑﻤﺎ ﻟﺤﻤﺔ
ﻭﺷﻮﻳﺔ ﺧﻀﺎﺭ ﻭﻗﺪ ﻛﺎﻧﺖ ﻭﺳﻴﻠﺔ ﻣﻮﺍﺻﻼﺗﻬﻢ ﺍﻟﺤﻤﻴﺮ ﻭﻟﻜﻦ ﻓﻲ ﺍﻟﺴﻨﻮﺍﺕ
ﺍﻻﺧﻴﺮﺓ ﻇﻬﺮﺕ ﺍﻟﺒﻜﺎﺳﻲ ﻭﻋﻤﺖ ﺍﻟﺮﻳﻒ ﻭﺍﺻﺒﺤﺖ ﻫﻲ ﻭﺳﻴﻠﺔ
ﺍﻟﻤﻮﺍﺻﻼﺕ ﺑﻴﻦ ﺍﻟﻘﺮﻯ ﻭﺑﻴﻦ ﺍﻟﻘﺮﻯ ﻭﺍﻻﺳﻮﺍﻕ ﻭﺭﻛﻮﺏ ﺍﻟﻨﺎﺱ ﻓﻲ
ﺍﺣﻮﺍﺽ ﺍﻟﺒﻜﺎﺳﻲ ﻳﻌﺘﺒﺮ ﻣﺨﺎﻟﻔﺔ ﻣﺮﻭﺭﻳﺔ ﺗﺴﺘﻮﺟﺐ ﺩﻓﻊ ﻏﺮﺍﻣﺔ ﻋﻠﻰ
ﺣﺴﺐ ﻗﺎﻧﻮﻥ ﺍﻟﺤﺮﻛﺔ .
‏( 4 ‏)
ﺇﻧﻨﺎ ﻧﺴﻮﻕ ﺍﻟﺤﺪﻳﺚ ﻟﻠﺴﻴﺪ ﻣﺪﻳﺮ ﻋﺎﻡ ﺍﻟﺸﺮﻃﺔ ﻭﻣﺪﻳﺮ ﺷﺮﻃﺔ ﺍﻟﻤﺮﻭﺭ
ﻭﻣﺪﻳﺮ ﺷﺮﻃﺔ ﻣﺮﻭﺭ ﺍﻟﺠﺰﻳﺮﺓ ﻭﺑﺎﻟﺘﺎﻟﻲ ﻣﺪﻳﺮﻱ ﺍﻟﻤﺮﻭﺭ ﻓﻲ ﻛﻞ ﺍﻗﺎﻟﻴﻢ
ﺍﻟﺴﻮﺩﺍﻥ، ﺍﻥ ﻛﺎﻥ ﻳﺤﺪﺙ ﻓﻴﻬﺎ ﻣﺎ ﻳﺤﺪﺙ ﻓﻲ ﺍﻟﺠﺰﻳﺮﺓ ﻧﻌﻢ ﺭﻛﻮﺏ
ﺍﺣﻮﺍﺽ ﺍﻟﺒﻜﺎﺳﻲ ﻗﺪ ﺗﻜﻮﻥ ﻓﻴﻪ ﻣﺨﺎﻃﺮﺓ ﻭﻗﺪ ﻳﻜﻮﻥ ﻓﻴﻪ ﻣﻈﻬﺮ ﻏﻴﺮ
ﺣﻀﺎﺭﻱ ﻭﻟﻜﻦ ﻣﺎ ﻫﻮ ﺍﻟﺒﺪﻳﻞ ؟ ﺍﻟﺮﺟﻮﻉ ﻟﻠﺤﻤﻴﺮ ؟ ﺍﻥ ﺍﻟﺒﻜﺎﺳﻲ ﺍﺻﺒﺤﺖ
ﺍﺩﺍﺓ ﻣﻦ ﺍﺩﻭﺍﺕ ﺍﻻﻧﺘﺎﺝ ﺗﻘﻞ ﺍﻟﺰﺭﺍﻉ ﺍﻟﻰ ﻣﺰﺍﺭﻋﻬﻢ ﻭﻳﺮﻋﻮﻥ ﺑﻬﺎ ﺳﻌﻴﺘﻬﻢ
ﻟﻘﺪ ﺩﻓﻌﺖ ﻋﺠﻠﺔ ﺍﻻﻧﺘﺎﺝ ﺍﻟﻰ ﺍﻻﻣﺎﻡ ﻭﺗﻮﺳﻊ ﺍﺳﺘﻌﻤﺎﻟﻬﺎ ﻭﻟﻴﺲ ﻟﻬﺎ
ﺣﻮﺍﺩﺙ ﺗﺬﻛﺮ ﺍﻟﻠﻬﻢ ﺍﻻ ﺑﻌﺪ ﺍﻥ ﺑﺪﺃﺕ ﺷﺮﻃﺔ ﺍﻟﻤﺮﻭﺭ ﺗﺘﺮﻙ ﺍﻟﻄﺮﻕ
ﺍﻟﻘﻮﻣﻴﺔ ﻭﺗﺘﻮﻏﻞ ﻓﻲ ﺍﻻﺭﻳﺎﻑ ﺑﺤﺜﺎً ﻋﻦ ﺍﻟﻤﺨﺎﻟﻔﺎﺕ ﻓﺘﺘﻢ ﺍﻟﻤﻄﺎﺭﺩﺍﺕ
ﻭﺗﻘﻊ ﺍﻟﺤﻮﺍﺩﺙ . ﺍﻳﻬﺎ ﺍﻟﺴﺎﺩﺓ ﺍﻧﻨﺎ ﻧﺜﻖ ﻓﻲ ﺣﻜﻤﺘﻜﻢ ﺑﺎﻥ ﺗﺘﺮﻛﻮﺍ ﺍﻟﻨﺎﺱ
ﻓﻴﻤﺎ ﻗﺪ ﺗﻌﺎﻳﺸﻮﺍ ﻣﻌﻪ ﺩﺍﺧﻞ ﺍﺭﻳﺎﻓﻬﻢ ﻓﺎﻥ ﺟﺎﺀﻭﻛﻢ ﻓﻲ ﺍﻟﻄﺮﻕ ﺍﻟﻘﻮﻣﻴﺔ
ﺍﻋﻤﻠﻮﺍ ﻓﻴﻬﻢ ﻛﻞ ﻗﻮﺍﻧﻴﻦ ﺍﻟﺤﺮﻛﺔ ﺍﻟﻌﺎﻟﻤﻴﺔ، ﻭﻛﺎﻧﻨﺎ ﻓﻲ ﻟﻮﻛﺴﻤﺒﻮﺭﻍ ﻻ
ﻧﺮﻳﺪ ﻣﻨﻜﻢ ﺗﻐﻴﻴﺮ ﺍﻟﻘﺎﻧﻮﻥ ﺑﺴﺤﺐ ﺑﻌﺾ ﺍﻟﻤﻮﺍﺩ ﻭﻟﻜﻦ ﺍﺳﺤﺒﻮﺍ ﺟﻤﺎﻋﺘﻜﻢ
ﻣﻦ ﺍﻟﻄﺮﻕ ﺍﻟﺮﻳﻔﻴﺔ ﻓﺎﻟﺴﻮﺩﻥ ﺩﺍ ﻛﻠﻪ ﻣﺎﺷﻲ ﺑﺎﻟﻤﺒﺎﺻﺮﺓ .

.

.

.

alsone


Source

%d مدونون معجبون بهذه: